Bray... Bral

Karya: Suherman Komara

Sumber Foto: Penulis

Bray... 

Geura nyingray

Lalangsè 

Poè

Itu gunung bangun ngungun

Dikeukeupan ku halimun

Diharudung

Bangung bingung

Bray

Geura ngagebray

Mata poè geuwat nguniang

Sangkan buana ngempray caang

Halimun geura tundung

Mèga hideung sina nyingkah

Bukakeun jalan nu ngabulungbung

Ngajajap sakumna umat nyiar kifayah

Bral geura miang

Jug geura tandang

Pangdunga marengan

Berkah salamet jauh tina rèwangan

Love

Lolongkrang haté
Geus lila pinuh ku karaha
Keclak cai panon
Geus teumampuh mulasarana

Jangji nu udar tina tali gadang haté
Geus lawas leupas
Muraykeun pasini
Mukakeun lawang kongkolak curucudna caimata

Sedih kingkin ngamalir
Ngabarabay maseuhan jagat
Jagabaya rasa teumampuh ngabendung berebeyna cimata
Nu kumapapang migandrung salira nu lawas ilang

Ringkang salira nyacag mamaras
Nyuit-nyuit sesebitan ati
Nambih kapeurih nambah tugenah

Kuring narah
Mun kudu sumerah pasrah
Kuring cadu
Mun kudu jadi jagasatru

 

                                                                                                Dicutat tina buku “Simpay Asih

                                                                                                Karya Suherman Komara

Layung nu anyar hibar
Séséléké dina sela-sela méga hideung
Nu mimiti reueuk ngudag-ngudag fajar
Ngalimpudan rasa kakeueung

Haté mimiti hariwang
Melang honcéwang
Jungjunan ngolémbar
Jangji nu geus pasini hariwang udar

Jangji pasini saati
Ngambah sagara
mo bet sulaya
Moal nepi ka cangcaya

Burinyay
Sanékala ngaburisat
Ngabéntar lamunan
Ngagebah haté anu mimiti cangcaya

Dicutat tina buku “Simpay Asih
Karya Suherman Komara

Karya:Suherman Komara,S.Pd.

Sumber Bing Image

Gunung ngahodhod cimunun muyung
Disimbut kuhalimun nu alum
Digeberan angin anu rintih nambah kasedih
Ati peurih tambah katurih

Gupay salira matak tikelay
Teuteup enung matak katenung
Nambih sedih ngageris rasa
Nulawas teukapiroséa

Rumasa
Kuring pernah kasarung
Migandrung ka nu anyar tepung
Rumasa kuring ka larung
Kana jungkrang nu longkéwang
Hampura Nung
Kuring geus nyacah kalbu salira
Hampura geulis
Kuring geus nyeuit deui tapak tatu salira

Sapanjang jalan nu disorang
Ngabulungbung leucir nepi ka mumunggang gunung
Gupay pucuk daun camara
Ngahiap-hiap kedal ucap pangbagéa

Luak-léok tikungan teu ka itung malah mah kalah kérok
Geter haté mimiti teger sabada nyorang lelewang jungkrang
Salira katawis gugupay ti mumunggang

Bagja nyaliara marengan imut salira
Méga haté nu tadi maleukmeuk
Kiwari béngras nyacas
Guligah nyingraykeun sagala katugenah

Lawung di mumunggang gunung
Munggaran urang patepung
Rarasaan awor jeung kelun halimun
Nu nyimbutan katresna urang duaan

Sumber Foto: Dokumen Pak Inan

Berbalut seragam lusuh, beralas sepatu rusak
kau selempangkan tas di bahumu
kau tempuh jalan setapak menuju gurumu

Jalan yang masih beralas tanah merah
berhambur kerikil dan daun kering yang berjatuhan
Langit begitu biru, namun tiada awan
yang menghalangi senyum si raja tata Surya

Peluh mulai berjatuhan di pelipisnya
Tak ia rasakan sama sekali sebagai beban
Ia merasa itu adalah semangat

Kini ia berdiri di depan kelas
setelah sepuluh tahun berlalu dengan singkat
Kini ia menjadi subjek yang mentransfer ilmu
setelah sebelumnya menjadi penimba ilmu

Kalakay haté teukendat gugupay
Katebak ku angin lirih nu nyulusup
Nyingraykeun lalangsé haté nu mimiti paburencay
Hiber kapakan néangan lamping pikeun nyanding

Dahan rasa beuki rosa méh-méhan mites
Geus lawas ampir ngarangrangan
Migandrung hujan katresna nu lawas halodo
Panjang pangharepan
Hiji mangsa cur maseuhan rohangan ati nu mimiti garing

Kuring gandrung
Miharep layung datang meuntaskeun salira Nung
Kuring gandrung
Neuteup rambut salira nu riab mapay-mapay sisi katumbiri
Ringkang anjeun kumalayang
Minuhan jomantara
Ringkang anjeun
ngolébat
Minuhan jagat

Kieu rasana gandrung
Rarasaan teu empéh kumalayang
Lamping teubosen disungsi
Jungkrang ditéang sugan aya anjeun sidéngdang